Nytt

Nytt nummer av Mellom er ute no! «FEMINISTISK SCIENCE FICTION OG ANDRE FIKSJONAR»

Betre seint enn aldri, som dei seier – endeleg har årets første nummer av Mellom kome i trykk! Her tar vi for oss temaet “feministisk science fiction og andre fiksjonar”. Temaseksjonen presenterer ei rekkje kvinnelege forfattarskap som vi ønskjer å vise fram for eit norsk publikum, og dei fleste tekstane har tidlegare ikkje vore omsette til norsk.  

03

Forfattar og slampoet Guro Jabulisile Sibeko introduserer den nigeriansk-amerikanske Nnedi Okorafors afrofuturistiske Binti-trilogi, Tharaniga Rajah presenterer den svensk-iranske Balsam Karams dystopi Hendingsranda og Kathleen Rani Hagen gir oss eit innblikk i forfattarskapet til Marian Womack, som har røter i Spania og Storbritannia og skriv økokritisk spekulativ fiksjon. I randa av det spekulative, men i kjernen av det absurde, har vi forfattar Gunnhild Øyehaugs omsetting av eit utdrag frå Nittini historier om Gud av den prislønte amerikanske forfattaren Joy Williams. Forfattar og omsettar Astrid Nordang har omsett italienske og sardinske Clelia Farris’ langnovelle «Kreativ kirurgi». Vårt nye redaksjonsmedlem Ingvill Kjærstein har omsett eit utdrag frå den japanske kultklassikaren Læretida til Stortå P av Rieko Matsuura og Ingvild Nærum gir oss ein smakebit på Mary Shelleys gløymde romanperle Det siste mennesket. I tillegg gir forfattar Sigbjørn Skåden sin vri på omtalesjangeren gjennom si lesing av antologien Walking the Clouds om urfolksfuturismar. 

Dei fantastiske – og passande – illustrasjonane vi var heldige nok til å kunne bruke er laga av den New Delhi-baserte kunstnaren Osheen Shiva.

tempImage2N3WOz

Til dette nummeret var vi også heldige nok til å få hjelpen av våre tre nye redaksjonsmedlemar: Amanda Aaserød, Ingvill Kjærstein og Karin Mæland. Med ekspertise i høvesvis fransk litteratur, japansk litteratur og sanskrit og indisk filosofi vil dei bidra i arbeidet med å fortsette å utvide Mellom. 

SPALTAR:

I spalta “Mellom periferiar” har litteraturvitar Ola Mile Bruland intervjua Kritikerprisvinnaren Gunnvald Axner Ims om sin omsetting av Felatun Bey og Rakim Efendi av Ahmet Mithat og tyrkisk litteratur.

Vi gir ein smakebit av ein komande omsetting. Dukkens alfabet av Camilla Grudova skal kome ut på Meteor Forlag, eit nytt, uavhengig forlag starta av redaksjonsmedlem Julia Wiedlocha, som har som mål å gi ut omsett fantastisk litteratur av hovedsakleg kvinnelege forfattarar.  

Ole Våge skriv om omsettaren Magnus Grønvold (1887–1960) som er kjend for mellom anna å stå bak den første omsettinga av Miguel de Cervantes Saavedras Don Quijote de la Mancha, saman med Nils Kjær. 

BOKOMTALAR

Vigdis Arnesen melder Liu Cixins roman Trelegemeproblemet, omsett av Lars Peder Kallar Devold (Kagge forlag, 2019) 

Maria Torkilsen Horvei skriv om Natthimmel med kulehòl av den amerikanske forfattaren Ocean Vuong, gjendikta av Mathias R. Samuelsen (Samlaget, 2019). 

Naïd Mubalegh Håvardsholm og Homayoun Mubalegh tar for seg diktsamlinga Vi overlever ikke av Fatemeh Ekhtesari, omsett av Nina Zandjani (TransFe:r Forlag, 2020). 


Illustrasjoner av Osheen Siva.